Fredu kien ġuvni t-tieni wild minn ħamsa, erba’subien u tifla. Missieru kien Pawlu u ommu Maria. Xogħlu kien ta’ mastrudaxxa u għal snin twal kien il-mastrudaxxa tar-raħal. Meta titkellem mal-anzjani ħafna minnhom jgħidulek li għandhom biċċa għamara minn tiegħu. Jien niftakru sa ma waqaf jaħdem b’għodda antika saħansitra bil-brace tal-idejn flok bid-driller tad-dawl u jaqta’ l-folji tal-injam bis-serrieq u jibni l-għamara skont is-sengħa antika. 

Fredu fi tfulitu u l-bidu ta’ żgħożitu ma setax igawdi l-festa ta’ Santa Liena peress li ma kinitx issir minħabba l- ġlieda tal-poplu Karkariż mal-Isqof fuq id-drittijiet tal-Kolleġġjata Elenjana. Għalhekk Fredu flimkien ma’ familtu kienu jitilgħu Għawdex għall-festa ta’ Santa Marija fil-Belt tar-Rabat peress li ommu kienet minn hemmhekk. Niftakar liz-ziju u lil missieri jirrakkontawli li jiftakru l-istatwa titulari tal-Katidral tinħareġ minn dar ta’ sinjura jarmawlha jdejha u jdawruha bil-marċ tal-aħħar tat-Tridu fir-Rabat Għawdex sakemm ġie deċiż li tittella’ fiċ-Ċitadella u tintuża bħala l-istatwa titulari tal-Katidral. Kien hawn li Fredu beda jinteressa ruħu u jmur jarma għall-festa ta’ Santa Marija. 

Meta fis-sena 1950 Birkirkrara saret il-festa u l-Kolleġġjata saret Bażilka Fredu flimkien ma’ missieru u ħutu s-subien bdew jiffrekwentaw il-każin tal-Għama. Hu kien tgħallem il-banda u għamel xi żmien idoqq l-althorn. Dak li kien tgħallem Għawdex beda jagħmlu għal mal-marċ tal-festa flimkien ma’ membri oħra tal-każin. Kien jagħmel umbrelel, raġġieri, u ornamenti oħra tal-injam u kartun miżbugħin bix-xniexel tal-karti tat-tajr u disinni tal-karti mwaħħlin magħhom. Dak iż-żmien it-tfal kienu jiġġennu biex jiddubaw xi umbrella u raġġiera għall-briju tal-marċ. Għall-marċ tal-Ġimgħa kien għamel ħafna fanali jixegħlu biex il-marċ kien ikun stil Venezjan. Missieri Ġużi u ħuh Żaru l-iskarpan dak iż-żmien kienu jieħdu ħsieb il-billiard tal-każin li kien fir-remissa ta’ ħdejn Coreschi. L-aħwa kollha kienu membri fit-team tal-football  tal-każin bl-isem George Town, u missierhom Pawlu peress li kien skarpan kien jieħu ħsieb isewwi ż-żraben tal-istess team. Sal-lum fil-bar tal-każin għad hemm ritratt ta’ dan it-team li semmejt. Fis-snin 60 missieri u ħutu ma baqgħux jinżlu ħafna l-każin imma Fredu baqa’ delettant u membru attiv fil-kumitat. Niftakar meta għamel l-armar tal-faċċata tal-każin u żżanżnet żżanżan fil-festa. Missieri kien niżżilni biex naraw din il-faċċata sabiħa. Għall-festi taċ-Ċentinarju tal-1978 Fredu kien għamel ħafna umbrelel u raġġieri u kien għamel ukoll kpiepel u paljijiet u brieret tal-kartun. Għadu jeżisti ritratt ta’ dan il-marċ ta’ filgħodu fejn jidhru diversi bżieżaq kbar u quddiemhom hemm l-arma ta’ Santa Liena bl-umbrellun tal-Bażilka. Din kienet tal-injam u Fredu kien ftiehem ma’ min żammha biex jekk iwassalha sħiħa sal-aħħar tal-marċ itieħ itih lira. 

Niftakar lil ħija Manuel li kien jaħdem ma’ Fredu  jiġi jgħid id-dar li qegħdin jaħdmu faċċata ġdida  biex jieħdu sehem għall-kompetizzjoni  ta’  Jum il-Ħelsien. Niftakar jien kont żgħir u kien hemm ħafna nies quddiem il-każin jaraw din il-faċċata li biha Fredu kien ħa t-tielet post. 

Ftit snin wara Fredu kien wieħed minn tal-bidu biex isiru pavaljuni ġodda biex jintramaw fil-Wied.

Fil-bidu tas-snin 80 Fredu kellu xi differenzi mal-kumitat u beda jarma fil-ħanut fi Triq il-Kbira. L-ewwel li jagħmel kienet il-faċċata għal żmien il-festa li ta’ kull sena kien iżidilha xi affrijiet fejn anki kien jarma statwa ta’ Santa Liena u diversi statwi oħra li jintramaw fit-toroq. Meta waqaf mill-ħanut beda jarma d-dar fl-istess triq u kien jagħmel wirja unika tal-festa. 

Fis-sena 1984 beda l-ewwel wirja tal-Ġimgħa Kbira fil-ħanut u ta’ kull sena kien ikompli jżid l-affarijiet u ornamenti biex għamel wirja forma ta’ knisja kompluta b’kollox. Fost l-aktar li kien jeħodlu ħin matul is-sena kien il-presepju tal-Milied li ta’ kull sena kien jibnih mill-ġdid. Għalhekk fl-aħħar snin kien jibda jipprepara minn Jannar id-djar u l-blat ta’ dan il-presepju fejn u tul is-snin ħa diversi premjijiet fil-kompetizzjoni nazzjonali. Dawn il-wirjiet baqa’ jagħmilhom sakemm kellu 81 sena. Jien u ibni Andreas konna mmorru narmaw l-affarijiet it-tqal u dawk li jintramaw bis-sellum biex hu jkun jista’ jlesti l-affarijiet iż-żgħar għall-wirja li jkun imiss. Hu għamel snin twal membru fil-Għaqda Mudelli tal-Knejjes u l-Għaqda Ħbieb tal-Presepju.

L-aħħar snin ta’ ħajtu Fredu għaddiehom jistrieħ f’dar tax-xjuħ fiż-Żejtun u fl-Imtarfa. Xorta baqa’ jieħu interess f’Birkirkara, speċjalment fit-team tal-football. Fredu kien bniedem riservat u ta’ ftit kliem għalhekk ħafna milli naf dwaru huwa mir-ritratti u l-ftit diskursati li kien ikollna waqt li naraw xi wirja. 

Ħaġa mill-isbaħ li ġrat hi li mal-Banda Duke of Connaught l-ewwel beda Fredu bl-armar tal-briju u armar ieħor, warajh komplejt jien fejn meta tajt kontribut kbir għall-Ġimgħa Kbira u l-armar tal-festa speċjalment bil-faċċata, l-umbrellun, u l-koppla fost affarijiet oħra. U issa ibni Andreas li huwa t-tielet ġenerazzjoni li kompliet miexja fuq il-passi ta’ Fredu bix-xogħol ta’ armar u xogħol ieħor. B’hekk għal tliet ġenerazzjonijiet wara xulxin il-familja tagħna tat kontribut kbir biex il-Banda Duke of Connaught ikollha armar mill-isbaħ li jagħti ġieħ il-festa tal-patruna tagħna Santa Liena.

Fredu Muscat miet fit-22 ta' April, 2023.